Фестивалот БЕАМ, единствената платформа во Македонија која ги наградува најдобрите настани и ги истакнува најуспешните проекти во индустријата за настани, на 4 март ќе ги објави победниците и ќе ги додели наградите во десетте категории.

Годинава на БЕАМ пристигнаа апликации на квалитетни и иновативни проекти, како и професионално реализирани настани кои ја одразуваат динамиката и растот на индустријата. Финалистите се распределени во 10 категории, опфаќајќи културни и музички настани, корпоративни проекти, бренд-активации, спортски и хуманитарни настани, како и конференции, што сведочи за разновидноста и креативноста во оваа сфера.

Комисијата за наградите е составена од докажани и искусни професионалци од областа на културата, креативните индустрии, маркетингот, продукцијата и лајв-комуникациите. Оваа година тие се соочуваат со навистина тежок избор, бидејќи конкуренцијата е силна, а пријавените настани поставуваат нови стандарди во индустријата. Оценувањето се врши според однапред утврдени и јавно објавени критериуми.

– Нѐ радува што оваа година имаме одлични апликации кои покажуваат високо ниво на иновативност и професионализам. Ова е доказ дека БЕАМ е платформата што недостасуваше во нашата индустрија. Жирито има сериозна задача да ги избере најдобрите, а ние со нетрпение ја очекуваме гала-вечерта кога ќе ги прогласиме победниците – изјави Маја Бабиќ, директор на БЕАМ.

Гала-церемонијата и официјалното прогласување на победниците ќе се одржи на 4 март, на која ќе присуствуваат финалистите, клиентите, медиуми и истакнати личности од индустријата и од јавниот живот. Таа вечер ќе биде посветена на креативноста, иновативноста и високите стандарди во организацијата на настани.

Фестивалот БЕАМ започна во 2023 година како единствена платформа за валоризација на креативноста и извонредноста во индустријата за настани во Македонија. Со секое ново издание, БЕАМ поставува нови стандарди и ја истакнува важноста на настаните како клучен дел од современата комуникација, маркетинг-стратегии и културниот развој. Фестивалот е место каде што креативноста, иновацијата и професионализмот добиваат заслужено признание.

Десетте категории во кои ќе бидат доделени награди се: Најдобар културен настан; Најдобар музички настан; Најдобар фестивал; Најдобар корпоративен настан; Најдобра конференција; Најдобар настан за бренд активација; Најдобар експо (саем) настан; Најдобар хуманитарен настан; Најдобар настан на државна институција; и Најдобар спортски настан. Годинава ќе биде доделено и Гран-при на настанот што ќе добие најмногу поени од сите категории.

(Текстот е објавен во „Културен печат“ број 270, во печатеното издание на весникот „Слободен печат“ на 1-2.3.2025)