Организацијата „Факултет за работи што не се учат“, во рамките на 19. издание на Фестивалот на современи уметности АКТО, со промоција на публикацијата „Прекарно за почетници“ ќе ја затвори меѓународната изложба „Нема време за работа. Нема време ослободено од работа.“.

Промоцијата на публикацијата „Прекарно за почетници“ ќе се одржи во објектот „Мала станица“ при Националната галерија во Скопје на 24 септември, со почеток во 19 часот. Со овој настан се затвора меѓународната изложба „Нема време за работа. Нема време ослободено од работа“, која беше отворена на 3 септември.

Уредници на брошурата „Прекарно за почетници“ се Виолета Качакова и Ивана Васева, лектурата и преводот се на Невенка Николиќ, графичкиот дизајн и илустрациите се на Немања Трајковиќ, а продукцијата на „Факултет за работи што не се учат“ (ФРУ).

– Публикацијата „Прекарно за почетници“ се однесува на сите независни уметници, културни работници и оние што раководат со мали уметнички и културни субјекти, кои работат во сферата на субвенционираната култура, која има ограничени ресурси. Во оваа средина, индивидуализацијата и конкуренцијата се главните параметри на доминантниот капиталистички начин на производство, а и институционалниот и вонинституционалниот сектор се потопени и потчинети на таа логика. Како резултат на тоа, преовладуваат лошите услови за работа, несигурноста на работата и недостатокот на социјална заштита. Публикацијата ги разгледува работничките права на независните уметници и културните работници, како и напорите за подобрување на нивните услови. Ги истражува овие прашања во поширок контекст на културните политики на земјата, кои ги обликуваат севкупните работни услови во вонинституционалниот културен сектор – посочуваат авторите на публикацијата.

Промовирана ќе биде и публикацијата „Острови на сродство: Колективен прирачник за инклузивни и одржливи уметнички институции“, која е резултат на двегодишна соработка во рамките на платформата „Острови на сродство“ (Islands of Kinship), која поврзува шест визуелни уметнички институции од различни региони во Европа (Прага, Братислава, Битола/Скопје, Келн, Хелсинки, Рига).

– Во оваа публикација група куратори, уметници и експерти, вклучени во нивните организации како координатори за инклузија и одржливост, размислуваат за социјалната и еколошката одговорност во уметничката и институционалната практика од теоретски, политички и практични перспективи. Публикацијата содржи и уметнички проекти што беа претставени на изложби и јавни програми во рамките на „Острови на сродство“ – истакнуваат од ФРУ.

Со промоцијата на публикациите се затвора меѓународната изложба „Нема време за работа. Нема време ослободено од работа.“ на која учествуваат десетина уметници од европската и балканската уметничка сцена: Селма Баниќ, Ленка Ѓоројевиќ и Матеј Ступица, „Хевит колектив“, Лукаш Хофман, Барбора Клајнхамплова, Доротеј Нешовски, Данило Прњат, Павла Сцеранкова, Јижи Скала, „Стонителерс“. Изложбата е поставена во рамки на 19. АКТО и поддржана е од Националната стратегија за ревитализација на Чешка (Chech recovery plan).

Досега на фестивалот АКТО се одржаа целодневен музички настан „Градот ме тера да пеам“ во Битола во партнерска соработка со платформата „Силата ЕУ младите“; насликани се серијата мурали низ Македонија, односно на Националната установа Центар за култура „Кочо Рацин“ во Кичево, на објектот на Националната установа Центар за култура „Марко Цепенков“ во Прилеп и два мурали на зградите на бул. Митрополит Теодосиј Гологанов во Скопје; се одржа и меѓународната изложба и јавна програма „Куќата што се распаѓа“ во Музеј на Македонија во рамките на проектот „Не сакаме да бидеме ѕвезди (туку дел од соѕвездија)“. До крајот на годината во рамки на фестивалот АКТО предвидени се уште неколку настани.

(Текстот е објавен во „Културен печат“ број 248, во печатеното издание на весникот „Слободен печат“ на 21-22.09.2024)