Капитенот на Манчестер Јунајтед, Бруно Фернандеш, одлучи да остане на „Олд Трафорд“ и покрај примамливата понуда од Саудиска Арабија, поточно од клубот Ал Хилал.

Португалецот откри дека директно бил контактиран од претседателот на Ал Хилал, но веднаш ја одбил понудата.

„Имав можност, претседателот на Ал Хилал ми се јави лично, но му реков дека не сум заинтересиран“, изјави Фернандеш.

Тој додаде дека разговарал и со тренерот на Манчестер јунајтед, Рубен Аморим, кој исто така го советувал да не прифаќа трансфер.

„Ал Хилал ме чекаше, но потоа зборував и со Аморим, кој ме замоли да не заминам. И Манчестер Јунајтед беше категоричен, клубот не сакаше да ме продаде“, објасни португалскиот репрезентативец.

Иако се работело за финансиски атрактивна понуда, Фернандеш потенцираше дека амбицијата за настап на највисоко ниво пресудила.

„Тоа беше амбициозен проект, лесен трансфер и одлична опција за моето семејство. Но јас сакам да се натпреварувам во најголемите европски натпреварувања, и затоа останувам тука“, заврши Бруно.