Хуан Карлос Фереро, тренерот на шпанскиот тенисер Карлос Алкараз откри дел од тактиката за мечот против Новак Ѓоковиќ.

Шпанецот и Србинот ќе се сретнат в петок од 21.00 часот, во полуфиналето на грен слем турнирот САД опен.

Тие играа само еднаш оваа сезона, а Ѓоковиќ победи во четвртфиналето на Австралија опен.

Ѓоковиќ води со 5-3 во победи, откако триумфираше на четири од последните пет дуели.

– Се радуваме што повторно ќе играме против Ѓоковиќ. Поразот во Австралија беше болен поради начинот на кој се случи, но условите тука се различни. Не мислам дека треба да се фокусираме на Новак, туку на она што Карлос го нуди во моментов. Ќе мора да го туркаме Ѓоковиќ до крајни граници, до точка каде што физички ќе може да разбере дека мечот станува тежок, дека го чини многу да го следи темпото на Алкараз. Тоа е она што ќе се обидеме да го постигнеме – вели Фереро.

Вториот полуфинален пар на турнирот е Јаник Синер (Италија) – Феликс Оже-Алијасим (Канада).