Осуден силувач и убиец од Јужноафриканската Република, кој избегал од затвор лажирајќи ја сопствената смрт, е уапсен во Танзанија. Криминалецот по име Табо Бестер бил на слобода цела година, откако се мислело дека се самозапалил и починал во затворска ќелија.

Потрагата започнала дури минатиот месец, откако повторената обдукција открила оти телото не е на Бестер.

Тој вчера бил фатен со својата девојка и уште еден осомничен и ќе биде екстрадиран во Јужноафриканската Република. Полицијата соопшти дека верува дека тројцата сакале да побегнат во соседна Кенија, пишува „Би-би-си“.

Бестер е познат како „силувачот од Фејсбук“, бидејќи ја користел социјалната мрежа за намамување жртви. Во 2012 година, тој беше осуден за силување и убиство на неговата девојка, моделот Номфундо Тихулу. Една година претходно, тој беше прогласен за виновен за силување и грабнување на две други жени.

Во мај беше објавено дека тој бил пронајден мртов во својата ќелија откако наводно се самозапалил во затвор во градот Блумфонтејн. Сепак, локалните медиуми почнаа да се сомневаат во смртта на Бестер на крајот од минатата година.

Во март, полицијата отвори нова истрага за убиство, откако дополнителните тестови покажаа дека починатиот не е Бестер и дека неидентификувано лице починало откако било удрено со тап предмет по главата.

Вработените во британската безбедносна компанија G4S, која го води затворот во кој се наоѓаше Бестер, се обвинети дека му помогнале да избега. Соопштено е дека тројца вработени добиле отказ.

Неколку луѓе пријавиле дека го виделе Бестер во текот на минатата година. Некои од нив тврдеа дека купил намирници во богато предградие на Јоханесбург и дека живеел таму во изнајмена вила.

Бегството на Бестер предизвика бес во Јужна Африка, која има една од највисоките стапки на сексуални напади во светот.