Вчера во Малме, градот домаќин на 68. издание на Изборот на песна за Евровизија, се одржа свечена церемонија на којашто беше извлечен редослед по којшто земјите учеснички ќе се претстават за време на полуфиналните вечери.

На годинашниот фестивал ќе се натпреваруваат претставници на 37 земји, а директно во финалето ќе се појават Велика Британија, Франција, Шпанија, Германија и Италија, како и минатогодишниот победник Шведска.

Останатите земји учеснички се поделени во две полуфиналиња.

Во првото полуфинале, кое ќе се одржи на 7 мај, ќе настапат Хрватска, Кипар, Ирска, Литванија, Полска, Србија, Украина, Австралија, Азербејцан, Финска, Исланд, Луксембург, Молдавија, Португалија, Словенија.

Во второто полуфинале, кое ќе се одржи на 9 мај, ќе настапат Албанија, Ерменија, Австрија, Чешка, Данска, Грција, Малта, Швајцарија, Белгија, Естонија, Грузија, Израел, Латвија, Холандија, Норвешка, Сан Марино.

Продуцентите на Евровизија допрва ќе ги дефинираат конечните редни броеви под кои ќе настапат земјите учеснички во соодветното полуфинале.

Што се однесува до финалистите, ждрепката утврди дека во првото полуфинале ќе гласаат Шведска, Велика Британија и Франција, а во второто полуфинале ќе гласаат Шпанија, Италија и Германија.

Инаку, Македонија нема да учествува на годинашното издание на Изборот на песна за Евровизија.

„Ваквата одлука е во најдобар интерес на граѓаните, имајќи предвид дека Јавниот сервис идната година, со сите свои капацитети ќе се фокусира на одбележување на големиот јубилеј, 80 години Македонско Радио и 60 години Македонска Телевизија“, гласеше во соопштението на МРТ.

Да потсетиме, минатата година победата отиде во рацете на шведската претставничка Лорин, која ги освои симпатиите на жири-комисијата и многубројната публика пред малите екрани со песната „Tattoo“. Ова е нејзина втора победа на ова музичко натпреварување – во 2012 година победи со песната „Euphoria“, која важи за една од најуспешните победнички песни во историјата на Евровизија.

Ова беше седма победа за Шведска на Евровизија и со тоа го достигна рекордот на Ирска, која исто така има седум победи.

Сите досегашни македонски претставници на Евровизија: „Proud“ нѐ направи горди, а цела Европа танцуваше на „Нинанајна“