Партијата на европските социјалисти (ПЕС) трајно ја исклучи владејачката партија Смер во Словачка, предводена од премиерот Роберт Фицо, потврдија четири функционери запознаени со одлуката.

Според неколку извори, раководството на ПЕС едногласно ја донело одлуката минатиот четврток, а конечната ратификација се очекува на состанок во Амстердам од 16 до 18 октомври.

Одлуката доаѓа откако Фицо се ракуваше со рускиот претседател Владимир Путин во Москва во мај за време на прославата на Денот на победата, додека на почетокот на септември беше во Пекинг, каде што се сретна со кинескиот лидер Си Џинпинг и белорускиот претседател Александар Лукашенко.

Членството на Смер во ПЕС беше суспендирано во октомври 2023 година, заедно со нивниот сојузник, партијата Хлас. За разлика од Смер, Хлас засега останува суспендирана, но не е трајно исклучена, соопштија функционери.

Во последните години, Роберт Фицо сè повеќе доаѓа во конфликт со европските социјалисти, особено поради забавувањето на усвојувањето на санкциите против Русија, но и поради обвинувањата дека го поткопува владеењето на правото во Словачка, според Политико.