Политичката група на либералите во Европскиот парламент побара од Европската комисија да ја суспендира исплатата на пари на Бугарија, оценувајќи дека Софија не ги исполнила институционалните услови и дека Европската унија не може да финансира политичка репресија од Фондот за обнова и отпорност, пренесува Н1.

Во писмото потпишано од претседателката на парламентарната група „Обнови ја Европа“, Валери Аје, како пример за таква политичка репресија врз политичките ривали беше наведено апсењето на градоначалникот на Варна, Благомир Коцев. Се проценува дека ова е направено со инструментализирање на антикорупциското тело, иако за да може да повлече пари од фондот на ЕУ, Бугарија се обврза на формирање независна антикорупциска комисија.

„Бугарија сега бара исплата од 653 милиони евра, додека во исто време камен-темелникот што треба да гарантира институционални реформи, имено формирањето независна антикорупциска комисија, е фундаментално поткопан“, напиша Аје.

Апсењето на Коцев предизвика серија масовни протести во Варна и други градови, а последниот, десеттиот во Варна, се одржа на 22 септември. Сепак, Апелациониот суд го продолжи притворот на Коцев еден ден подоцна. Тој е под истрага за корупција и учество во организирана криминална група.

„Благомир Коцев, познат по своите проевропски и антипутински ставови, е изложен на исклучително сурови услови на притвор – со високо ниво на безбедност, минимален излез и бројни ограничувања, што се оправдува само со тоа што неговото ослободување би можело да влијае на истрагата“, оценија пратениците од групата „Обнови ја Европа“.

Се додава дека ова е токму спротивното од сузбивањето на корупцијата, дека антикорупциското тело се користи за неутрализирање на демократски избрани претставници на опозицијата преку полициска принуда и дека ова е „директен напад врз демократските вредности што се основа на европскиот проект“.

Во писмото, се истакнува дека Варна е многу повеќе од само бугарска општина, бидејќи е стратешки центар на НАТО на Црното Море, источна поморска порта на ЕУ и примарна цел на операциите на руско влијание, поради што систематското поткопување на демократската градска власт на Благомир Коцев ги дестабилизира институциите во градот каде што Русија би извлекла максимална стратешка корист од политичкиот хаос.

Затоа европското финансирање на антикорупциската комисија, која функционира како политичка алатка во Бугарија и систематски собира компромитирачки материјал за целни операции против политичките противници, е исто така директна закана за европската безбедност, пишува во писмото на европските либерали.

Валери Аје, исто така, наведува дека истрагите на Европското јавно обвинителство се попречени во Бугарија со отежнување на претресите, задржување на банкарски податоци и криење докази за јавни набавки.

Либералите, исто така, ги обвинуваат властите во Софија за потчинување на тајните служби на приватни мрежи контролирани од олигархот Делијан Пеевски, кој е под санкции на САД, дека правните лекови се систематски ослабени со измени на законот и дека се создадени законски предуслови за неопределен политички мотивиран притвор.

Коцев, член на проевропската опозициска партија Продолжуваме со промените и прв човек на Варна од 2023 година, беше уапсен на 8 јули годинава со уште тројца членови на градската управа врз основа на пријава на лице кое неуспешно конкурирало на јавен тендер.

По апсењето на Коцев, претседателката на европската партија Алијанса на либералите и демократите за Европа, Свења Хан, побара итна средба со европскиот комесар за правда, Мајкл Мекграт.

Таа истакна дека во Бугарија во последните месеци се забележува загрижувачки тренд – растечки политички притисок врз судството, зголемен ангажман на обвинителството против опозицијата и обиди за ослабување на поделбата на власта преку измени во законот.