Претседателката на Европската комисија, Урсула фон дер Лајен, во понеделник го отфрли предлогот за недоверба против неа покренат од крајната десница пред гласањето во четврток во Европскиот парламент во Стразбур.

„Тоа е преземено директно од најстариот прирачник на екстремистите, кои го поларизираат општеството, ја еродираат довербата во демократијата со лажни тврдења“, изјави фон дер Лајен пред Европскиот парламент во понеделник.

Критикувајќи ги предлагачите како „антиваксери“ и „апологети“ на рускиот претседател Владимир Путин, таа ги повика пратениците да гласаат против предлогот и да ја вратат довербата во Европската комисија во критичен момент за ЕУ.

„Кога комисијата ќе седне со САД за да преговара за трговија и царини, Европа мора да покаже сила. Кога ќе се залагаме за иднината на Украина, Европа мора да покаже сила“, рече таа.

Како што пишува РСЕ, гласањето за доверба го покрена крајнодесничарскиот романски европратеник, Георге Пипереа, кој ја обвинува фон дер Лајен за недостаток на транспарентност во врска со пораките што ги испратила до директорот на фармацевтскиот гигант Фајзер за време на преговорите за вакцините против ковид – 19.

Одбивањето на Европската комисија да ги објави пораките – кои се во фокусот на неколку судски случаи, им даде тежина на критичарите кои ја обвинуваат нејзината шефица за централизирано донесување одлуки.

Надвор од аферата „Фајзергејт“, романскиот европратеник Пипереа ја обвинува Европската комисија за мешање во неодамнешните претседателски избори во неговата земја, на кои проевропскиот Никусор Дан тесно го победи критичарот на ЕУ и националист Георге Симион.

Изборите се одржаа откако уставниот суд на Романија го поништи првичното гласање поради наводи за руско мешање и масовна промоција на социјалните медиуми на водечкиот кандидат на крајната десница, на кого му беше забрането повторно да се кандидира.

Најголемата партија во парламентот, Европската народна партија (ЕПП), на која припаѓа и фон дер Лајен, категорично отфрла гласање против шефицата на Комисијата.

Успешното гласање за недоверба би предизвикало оставка на Европската комисија предводена од фон дер Лајен, што се случува за прв пат во историјата.

Најблиската паралела датира од март 1999 година, кога тимот предводен од Жак Сантер од Луксембург поднесе оставка поради обвинувања за корупција и лошо управување, наместо да се соочи со гласање за недоверба.