Maкедонскиот претставник, Еурофарм Пелистер со пораз ја завршува сезоната во Лигата на шампионите откако вечерва во Битола ПСЖ славеше со 26:35.

Уште пред натпреварот беше познато дека Пелистер нема шанси за следна фаза, па така ракометарите на македонскиот шамоион без притисок влегоа во натпреварот. Исто така натпреварот немаше резултатско значење и за ПСЖ бидејќи немаше шанси да дојде до второто место кое обезбедуваше директно четвртфинале.

ПСЖ од почетокот на натпреварот започна подобро и брзо поведе со 7:3, но Пелистер со серија од три гола дојде до еден негатива. Сепак, Французите потоа повторно додадоа гас и на пауза заминаа со 18:13.

Во второто полувреме предноста на ПСЖ дојде и до највисоките „плус девет“ со кој заврши натпреварот.

Најефикасен кај Еурофарм Пелистер беше Филип Кузмановски со осум гола, а Пешеввски постигна четири.

На табелата Пелистер заврши како седми (претпоследен) со осум бода до кои стигна со учинок од три победи, две нерешени и девет порази. Зад македонскиот претставник остана само Фредерициа со три бода, а пред битолскиот состав се: Висла Плоцк (11), Динамо Букурешт (12), ПСЖ (18), Фуксе Берлин (18), Спортинг (18), Веспрем (24).