Младите ракометари на Еурофарм Пелистер во финалето на квалификацискиот турнир од групата 4 во Лигата на шампионите ќе играат против Динамо Букурешт од Романија.

Во второто полуфинале на турнирот во Букурешт, домаќинот триумфираше над Висла Плоцк од Полска со 31:28.

После првото полувреме Романците во Динамо Арената имаа позитива од „плус шест“ предност (19:13).

Кај победникот најефикасен беше Александру Космин Станкиу со осум голови, еден повеќе од Рарес Андреј Балу.

Претходно во првиот полуфинален меч Еурофарм Пелистер со 37:29 славеше победа над полскиот Киелце.

Финалето помеѓу Еурофарм Пелистер и Динамо Букурешт за учество на завршниот турнир во Келн, Германија, во премиерното издание на младинската ЛШ, ќе се игра в петок (18 април) од 18.00 часот.