Денеска ќе стартува новата сезона во македонската машка ракометна Супер лига со натпреварот од првото коло помеѓу екипите на Бутел Скопје и актуелниот шампион Еурофарм Пелистер.

Овој меч ќе се игра во салата „Антон Димитров“ од 18.00 часот, битолската екипа ја има фаворитската улога, а домаќините заедно со своите навивачи ќе се обидат да направат изненадување и дојдат до позитивен резултат.

Играчите предводени од тренерот Рубен Гарабаја ја почнаа сезоната со освојување на пехарот во Супер купот и победата над најголемиот ривал Вардар 1961.

– Македонското првенство е силно натпреварување, но наша цел е да победиме на секој натпревар и да ги освоиме сите домашни титули – вели Гарабаја.

Останатите дуели од првото коло ќе се играат в сабота од 17.00 часот, а се среќаваат: Алкалоид – Охрид, Куманово – Радовиш, Прилеп – Еурофарм Пелистер 2, Струга – Вардар 1961 и Тинекс Пролет – Тиквеш.