Еурофарм Пелистер го претрпе вториот пораз во Лигата на шампионите, губејќи на домашен терен од данскиот ГОГ Гудме со 28-31 (14-14). Битолчани имаат за што да жалат, бидејќи во првото полувреме стигнаа и до предност од пет голови, но падот во концентрацијата на крајот од првиот и почетокот на вториот дел ги чинеше скапо.

Почетокот мина во израмнета игра, но по головите на Кузмановски и Манасков, македонскиот тим се одлепи на 7-4, а потоа и на 10-5. Сепак, Данците реагираа со игра „седум на шест“ и го искористија падот на домашните, па успеаја да стигнат до израмнување на полувремето – 14-14.

Вториот дел ГОГ го отвори многу подобро и со серија 2-9 првпат поведе со +3 (14-17). И покрај напорите на Кузмановски и Манасков, гостите успеаја да ја задржат контролата. Манасков намали на 23-24, но промашените напади на Пелистер ја отворија вратата за ново одлепување на Данците.

До крајот, гостите ја одржуваа предноста и славеа значајна победа. Најефикасен на натпреварот беше Фредерик Бјере со неверојатни 13 гола од исто толку обиди, додека кај Пелистер блесна Дејан Манасков со 9 погодоци. Голманите на македонскиот тим, Митревски и Хаидаридад, запишаа по три интервенции, додека кај ГОГ Салах Бутаф одбрани осум удари.