Европската комисија е загрижена од „забрзаното“ усвојување на некои од измените на Законот за Кривичниот законик, кои ги намалуваат максималните законски казни и имаат импликации врз примената на застареноста, влијае на голем број случаи на корупција на високо ниво.

Портпаролката на Европската комисија, Ана Писонеро за ТВ 24 изјави дека во Комисијата изразуваат жалење поради недостатокот на сеопфатни консултации на домашните чинители со Брисел пред нивното усвојување, како и за употребата на европско знаменце која според ЕУ, треба да биде конзистентна и јасно поврзана со законите кои првенствено имаат за цел усогласување на националното право со европското законодавство.

– Северна Македонија се обврза да го промовира владеењето на правото и да се бори против неказнивоста и затоа санкциите за корупциски активности мора да бидат ефективни, пропорционални и разубедувачки – вели Писонеро.

Од Европската комисија додаваат дека зајакнувањето на довербата во правосудниот систем и несмалено справување со корупцијата, вклучително и преку солидна истрага, како и гонењето и конечното осудување на случаите на корупција на високо ниво е од клучно значење. А Комисијата ќе продолжи да го следи развојот на владеењето на правото многу внимателно, вклучително и во контекст на пристапните преговори.

Освен ЕУ, измените во Кривичниот законик ги разгледува и правниот тим на Амбасадата на САД во земјава.

– Правниот тим на американската амбасада ги разгледува. Јас лично не сум ги видела, така што не можам да ги коментирам. И како што кажавме во соопштението на Стејт департментот, потребно е да се следат процедурите на правниот систем на земјава – изјави американската амбасадорка Анџела Агелер, одговарајќи на новинарско прашање на вчерашната церемонија на почетокот на работите за изградба на Коридорот 8.