Селекцијата на Данска утревечер (18 часот) на стадионот „Паркен“ ќе игра пријателски натпревар против Србија, а капитенската лента ќе биде на раката на Кристијан Ериксен.

Ова ќе биде прв настап на Ериксен на стадионот „Паркен“ во Копенхаген, откако во јуни минатата година доживеа срцев удар на натпреварот од Европското првенство против Финска. Тогаш неговиот живот беше спасен во последен момент, а лекарите кои правеа реанимација подоцна открија дека срцето на Ериксен престанало да чука на неколку секунди.

– Тоа сигурно ќе биде посебно за мене, бидејќи не сум бил на „Паркен“ оттогаш. Сега сум многу среќен што се враќам тука и што повторно ќе играм фудбал – изјави Ериксен.

По шестмесечна рехабилитација Ериксен во јануари потпиша за Брентфорд откако доби дозвола од Премиер лигата да игра со вграден дефибрилатор кој ја регулира работата на срцето.