Турскиот претседател Реџеп Таип Ердоган изјави дека на претстојното Генерално собрание на ОН во Њујорк ќе ја покрене темата за „масакрите“ што ги изврши Израел во Појасот Газа, изразувајќи надеж дека поширокото признавање на Палестина би можело да ги забрза напорите за решение со две држави.

Пред да замине за Њујорк, Ердоган им изјави на новинарите дека за време на неговата посета ќе разговара за трговската соработка и одбранбената индустрија со американскиот претседател Доналд Трамп, како и ќе се сретне со сирискиот претседател Ахмед ал-Шар, објави Ројтерс.

Осумдесеттата редовна сесија на Генералното собрание на Обединетите нации (ГСОН) беше отворена на 9 септември 2025 година и ќе трае до 8 септември 2026 година.

Претседател на Генералното собрание на 80-то свикување е поранешната министерка за надворешни работи на Германија од редовите на Зелените, Аналена Бербок, според соопштението за медиумите на оваа меѓународна организација.

Темата на овогодишната сесија е „Подобро заедно, 80 години и повеќе за мир, развој и човекови права“.

Дебатата на високо ниво ќе се одржи од 23 до 27 септември и ќе заврши на 29 септември 2025 година.

Се очекува 195 делегации да учествуваат на сесијата на Генералното собрание на Обединетите нации.