Пратениците на Европскиот парламент ја прогласија Русија за „држава спонзор на тероризмот“, јави Еуроњуз.

Парламентот денеска усвои резолуција за најновите случувања во „руската брутална, агресивна војна против Украина“. Претставниците истакнаа дека намерните напади и злосторства извршени од страна на руските сили и нивните агенти врз цивилите во Украина, уништувањето на цивилната инфраструктура и другите сериозни прекршувања на меѓународното и хуманитарното право претставуваат акти на тероризам и воени злосторства.

Во овој контекст, тие ја сметаат Русија за држава која го спонзорира тероризмот и држава која „користи средства за тероризам“.

Со оглед на тоа што ЕУ во моментов не може официјално да прогласува држави за спонзори на тероризмот, Парламентот бара да се донесе соодветна правна рамка. Овој предлог потоа треба да биде испратен до Советот за да биде разгледана можноста за додавање на Русија на таквата листа на ЕУ на држави кои го спонзорираат тероризмот. Ова би предизвикало силни рестриктивни мерки против Москва и би имало значителни рестриктивни последици врз односите на ЕУ со Русија.

Во меѓувреме, пратениците го повикуваат Советот да ги вклучи руската група Вагнер и 141-та специјална моторизирана единица позната како „Кадровити“, како и други вооружени групи, паравоени единици и посредници финансирани од Русија, на списокот на терористи на ЕУ.