
Ендометриозата е најчест причинител на неплодноста
Ендометриозата e состојба во која ткивото на матката расте и ги зафаќа другите делови на телото. Тaа може да ги зафати јајчниците, јајцеводот, надворешниот дел на матката, дебелото црево и други внатрешни регии. Како што доаѓа до хормонски промени за време на менструалните циклуси, ткивото се оштетува и може да предизвика болни атхезии или рани.
Препорачано
Болките непосредно пред, за време на циклусот и по него се најчестите симптоми за појава на ендометриоза. Кај некои жени симптомите се јавуваат за време на сексуалниот однос, но и потоа и за време на придвижување на цревата или при уринирање. Понекогаш се чувствува бока и во пределот на карлицата и долниот дел на грбот. Многу жени кои имаат ендометриоза имаат благи, па дури и незабележителни симптоми кои можат да варираат во зависност од локацијата на израстоците. Доколку болката трае повеќе од два дена, воздржете се од секојдневните активности, а доколку продолжи и по циклусот, обратете се кај вашиот гинеколог за испитување и третман.
Разни теории
Понекогаш првиот и единствен симптом на оваа состојба е проблемот со забременување. Причините за ова сѐ уште не се познати. Сепак, медицинскиот третман може да помогне во отстранување на некои од симптомите, а со тоа и лекување на неплодноста.
Причината за растењето на ендометриското ткиво надвор од матката не е позната, но докторите имаат неколку теории за тоа. Наследноста игра голема улога, така што некои ендометриски клетки можат да се најдат уште од самото раѓање. Друга теорија, пак, е дека ендометријалните клетки кои се содржат во менструалната крв наместо да излезат целосно надвор, се враќаат назад низ јајцеводите до карличната празнина. Овие клетки имаат способност да се лепат на органите и да растат и крвават во одредени периоди. Ова се само две од многуте теории за појавата на ендометриоза.
Ризични групи и третман
Ова е почеста појава кај жените кои:
– Се во триесеттите и четириесеттите
– Никогаш немале деца
– Имаат менструални циклуси подолги од 7 дена
– Имаат циклуси помали од 28 дена
– Менструалните циклуси започнале на 12-годишна возраст
– Имаат мајка или сестра која имала ендометриоза
Во зависност од типот и стадиумот на ендометриозата, постојат повеќе видови на третман. Лековите за болка обично помагаат во намалување на болката и грчевите, но тие само ги лекуваат симптомите, не и ендометриозата.
Со помош на хируршка интервенција – лапараскопски хирургот може да ги отстрани видливите израстоци и атхезии. Најчесто болката се губи, но симптомите можат да се вратат по одреден период. Затоа, најдобро е по операцијата да се препише хормонска терапија. Во најсериозните случаи на ендометриоза може да се примени лапаратомија или отворена хируршка интервенција на абдомен со цел да се отстранат израстоците, или хистеректомија, што подразбира отстранување на матката и во повеќето случаи јајчниците или дел од нив.