Шпанскиот фудбалски тренер Унаи Емери денеска потпиша нов петгодишен договор со Астон Вила, јави „Би-Би-Си“.

На Емери му беше врачен нов договор откако Астон Вила оваа сезона заврши на четвртото место во англиската Премиер лига и се пласираше во Лигата на шампионите.

– Многу сум среќен што го продолжив договорот со клубот. Во Астон Вила има одлична хемија. А навивачите прават да се чувствувате како дома – изјави Емери.

Емери пристигна во Астон Вила во октомври 2022 година, а како тренер ги водеше Арсенал, Севиља, Пари Сен Жермен, Спартак Москва, Валенсија и Виљареал.

– Градиме нешто посебно со Унаи и воодушевени сме што тој потпиша нов договор со клубот до 2029 година. Како што влегуваме во нашата историска година, во која ја славиме нашата 150-годишнина, имаме многу да очекуваме со Унаи на клупата – вели претседателот на Астон Вила, Насеф Савирис.