Според поранешниот француски репрезентативец, Емануел Пети, претседателот на шпанскиот фудбалски клуб Реал Мадрид, Флорентино Перез, е најголемиот проблем на клубот, а не француската ѕвезда Килијан Мбапе.

Светскиот шампион со Франција и поранешен играч на ПСЖ, кој пристигна во шпанската престолнина во летото 2024 година, се најде под лупа откако беше елиминиран од Арсенал во четвртфиналето на Лигата на шампионите. И покрај импресивните 34 постигнати гола досега, Мбапе е обвинет за колективните неуспеси, но според Пети, коренот на кризата лежи на друго место.

– Вистинскиот проблем не е Мбапе – туку Перез. Тони Крос се пензионираше, Лука Модриќ сега има 39 години. Овие двајца играчи го контролираа средниот ред со години и го направија Реал речиси непобедлив. А клубот како да не сфати што губеше и не планираше за иднината без нив – се зборовите на Пети за BesteOnlineCasinoNederland.

Според него, Реал Мадрид страда од недостаток на рамнотежа во својот состав, при што акцентот на индивидуалноста му штети на тимот:

– Перез беше опседнат со идејата да го потпише Мбапе за три сезони и кога конечно го оствари својот сон, не сфати дека ја губи контролата во средниот ред. Нема ритам, нема организација. Винисиус Жуниор не е истиот, Џуд Белингем не е ист, Родриго не се развива, а им недостасува и солиден бек. Исто така, ги видовме Белингем и Антонио Рудигер како се судираат на тренинг – атмосферата во соблекувалната не е добра. Има премногу его во овој тим и премногу играчи кои мислат на Златната топка, а не на тимот – вели Пети.