Пријателството меѓу актерите Ема Вотсон и Том Фелтон е навистина магично. Тие се запознаа пред нешто повеќе од две децении, на снимањето на филмската франшиза за Хари Потер, во која ги играа улогите на Хермиона Гренџер и Драко Мелфој.

Фелтон ќе го издаде својот мемоар „Beyond the Wand: The Magic and Mayhem of Growing Up a Wizard“ на 12 октомври годинава, а неговата долгогодишна пријателка Вотсон напиша долг предговор за записот, објави „Гламур“.

„Ја знаеш онаа личност во твојот живот која прави да се чувствуваш видено? Онаа личност која, на некој начин, е сведок на сѐ што се случува? Онаа личност која знае, навистина знае, што ти се случува и низ што поминуваш без да мораш да ѝ раскажеш? За мене, таа личност е Том Фелтон“, пишува Вотсон во предговорот.

Верните обожаватели на филмската франшиза за Хари Потер знаат дека Фелтон ѝ бил детска симпатија на Вотсон. Иако актерката вели дека нивното пријателство „не започнало добро“, таа денес го смета за своја „сродна душа“.

„Секогаш се обидувам да им ја објаснам природата на нашиот однос на луѓето. Ние се сакаме на посебен начин веќе дваесет години и веќе ни самата не знам колку пати луѓето ни рекле ‘Сигурно сте се бакнале кога сте биле пијани, барем еднаш’, ‘Сигурно сте се бакнале’, ‘Мора да има нешто повеќе тука’. Но, тоа што го имаме е подлабоко од тоа. Тоа е една од најчистите љубови кои постојат. Ние сме сродни души и секогаш си го чувавме грбот. Знам дека ќе го правиме тоа и во иднина“, објаснува актерката, опишувајќи го нејзиниот однос со Фелтон.

„Понекогаш е тешко да се живее во свет во кој луѓето бргу те осудуваат, се сомневаат во тебе и ти ги преиспитуваат намерите. Том не го прави тоа. Знам дека тој, дури и ако сум згрешила нешто, сфаќа дека мојата намера била добра. Знам дека секогаш ќе ми верува“, стои во предговорот на мемоарот.

На крајот од предговорот, Вотсон вели „Светот има среќа што те има, но јас имам уште поголема среќа што те имам за пријател“.

Ема Вотсон откри во кој колега актер била вљубена за време на снимањето на филмовите „Хари Потер“