Пејачот Елтон Џон рече дека е „воодушевен“ што неговиот албум „Кој верува во Ангели“ (Who Believes In Angels) стана број еден во Британија.

Албумот, создаден во соработка со американската кантри ѕвезда Бренди Карлајл, го зазеде првото место на топ листите, 52 години откако Елтон Џон за првпат се искачи на позицијата на најслушаните музичари во Британија.

“Изгледа сосема необично што мојата кариера трае толку долго. Секогаш е добро чувството да се биде на врвот на табелата, без разлика каде се наоѓам. А со овој албум сум особено воодушевен бидејќи мислам дека тоа е најдобриот албум што сум го направил по долго време”, изјави тој за „Би-би-си“.

Овој албум, кој е снимен на крајот на 2023 година, критичарите го нарекуваат „храбар и светол“, и покрај документарниот филм што го придружуваше снимањето на албумот, во кој музичарот покажа проблематично однесување.

Во документарецот, Елтон Џон повремено удира во слушалките, им вика на своите соработници, ги кине текстовите и се заканува дека ќе се откаже. Тој рече дека е „нервозен и раздразлив“ делумно поради тоа што се опоравува по замена на колкот, но дека сѐ е во ред откако ја снимил првата песна „Розата на Лаура Ниро“.

„Бев многу нервозен затоа што сакав албумот да звучи на одреден начин, но не можете секогаш да гарантирате дека ќе биде така. Мислам дека моите нерви и моите несигурности и моите сомнежи доведоа до неколку моменти на лошо однесување, кои беа само фрустрации во мене“, рече тој.

Албумот првично требаше да излезе во 2024 година, но тоа беше одложено една година поради проблеми со видот со кои пејачот се соочи минатата година.