Во рамките од 23 коло во најсилното италијанско првенство составот на Наполи славеше важна победа на гостувањето кај Сасуоло со 0:2.

Головите за клубот од Неапол ги постигнаа Кварацхелија и Осимен за вкупно 20 триумф сезонава. Играчите на тренерот Лучано Спалети сигурни чекорат кон титулата во Серија А, моментно се првопласирани со 62 бодови, 18 повеќе од второпласираниот Интер кој има еден меч помалку.

Македонскиот репрезентативец Елиф Елмас беше стартер на стадионот во Реџо Емилија настапи до 85 минута.

Нашиот играч по завршувањето на натпреварот со Сасуоло кажа дека неговата екипа оди чекор по чекор и дека никој не размислува на титулата сè додека не е остварена целта и се соберат доволно бодови за толку посакуваното Скудето.

– Сè уште не сме го изговориле зборот Скудето. Ние само размислуваме за секој натпревар кој што доаѓа, без да гледаме премногу напред. Тоа е она што го направивме до сега и ќе продолжиме да го правиме тоа. Ова е многу важна победа. Задоволни сме и овие три бода на табла ни даваат поголема самодоверба и сила. Многу сум среќен со мојот настап. Се надевам дека ќе му се оддолжам на тренерот за вербата што ја покажа во мене со тоа што бев стартер. Чувствувам дека сум во добра форма, па само се обидувам да му помогнам на тимот и да се ставам на располагање на моите соиграчи – се зборовите на Елмас за италијанските медиуми.