Хрватската фудбалска федерација (ХНС) одлучи сите дерби натпревари меѓу најголемите хрватски клубови во борбата за шампионската титула да ги судат елитни судии од Лигата на шампионите.

Голема борба се води во трката за шампионската титула оваа сезона во првенството, моментно на првото место е Риека со 53 бодови, еден повеќе од второпласираниот Хајдук Сплит на Александар Трајковски, а на третата позиција е актуелниот првак Динамо Загреб на Аријан Адеми и Стефан Ристовски со 48.

Оваа одлука на федерацијата е донесена по големите скандали со ВАР снимките кои протекоа во јавноста и откако хрватските судии имаа бројни грешки во одлуките. Хрватите сакаат да се постигне апсолутна регуларност и верба во најправеден можен исход на лигата.

Скандалот околу ВАР и протечените снимки започна со натпреварот Вараждин – Хајдук. Контроверзен беше поништен гол на Хајдук. Тогаш на социјалните мрежи се појавија разговорите на судиите. Разговорите се редеа, по што настана вистински скандал.

На крајот, цехот го плати претседателот на Комисијата за судии на ХНС, Бруно Мариќ. Тој поднесе оставка, но горчливиот вкус остана поради судиските одлуки.

Првиот човек на ХНС Маријан Кустиќ реши да ги смири страстите. Успеа да направи голем потег и со помош на УЕФА ќе ангажира елитни европски судии. Така, клучните натпревари ќе ги судат познати арбитри од европските терени, а тоа треба да го намали притисокот врз домашните судии.