Поранешнaтa пратеничка на Косовското собрание од редовите на Алијансата за иднина на Косово, Тиме Кадријај се очекува да биде сослушана од Специјалниот суд на 18 септември.

Кадријај, во изјава за Телеграфи, рече дека денеска официјално ја примила поканата од Специјалниот суд за интервјуирање.

– Датумот кога ќе бидам интервјуирана од Специјалниот суд е 18 септември. Според писмото што го добив, ќе бидам сослушана во својство на сведок и јас ќе одговорам на оваа покана. Немам што да докажам, освен праведната војна што ја водеше Ослободителната војска на Косово – изјави Кадријај за Телеграфи.

Таа ја искористила приликата и за да ги искритикува пратениците кои гласале за создавање на Специјалниот суд, со седиште во Хаг чија цел е истрага на злосторствата на терористичката ОВК извршени за време и по војната со српските сили во 1998 и 1999 година.

– Срамота е што пратениците гласаа за Специјалниот суд кој поканува на интервју војници кои се бореле за слободата на Косово, деградација е да се покани лекар кој служел во војната – изјавила таа. На крајот, поранешната пратеничка Кадријај додала дека е среќна што била дел од ОВК.

Инаку, Специјалниот суд го интервјуираше и косовскиот премиер во оставка, истовремено и претседател на Алијансата за иднина на Косово, Рамуш Харадинај. Тој беше сослушан во својство на осомничен.