Жителите на Криволак и на Пепелиште, но и од останатите населени места во околината на Неготино изразуваат загриженост по најавите за уништување на 110 тони на експлозивен материјал на воениот полигон во Криволак. Станува збор за гранати, поточно 12.300 артилериски зрна од Првата светска војна што, според Беким Максути од Дикрекцијата за заштита и спасување, беа пронајдени во Битола.

– Уништувањето на 110 тони гранати дополнително ќе го загади воздухот во Вардарскиот регион во услови на енормна аерозагаденост, реагираат од Здружението на граѓани „ЕкоВита“ од Неготино.

Екологистите реагираат на носењето на опасен отпад во Неготино, во случајот експлозивен материјал, наместо, како што велат, да се носат нови инвестиции.

– Составот на гранатите е непознат и сомнителен и тоа е дополнителна причина за загриженост. Согласно Архуската конвенција, граѓаните мора да бидат информирани и вклучени во целиот процес, кога се работи за заштита на животната средина. Нашиот град стана синоним на опасна депонија наместо квалитетно вино и грозје и тоа мора да се смени, велат од Здружението „ЕкоВита“ од Неготино.