На 23 јули 2011 година, музичкиот свет ја загуби една од најавтентичните и најмоќни уметници на своето време. Ејми Вајнхаус почина на 27-годишна возраст во својот дом во Кемден, Лондон, од труење со алкохол. Денес, четиринаесет години подоцна, нејзиното наследство останува силно присутно, инспирирајќи нови генерации уметници и обожаватели, пишува „Пипл“.

Пејачката на хитовите „Valerie“ и „Back to Black“ стана глобална ѕвезда уште во своите рани дваесетти. Но зад блескавите сцени и музичките успеси, Вајнхаус се соочуваше со долготрајна борба со зависности и булимија. И покрај нејзините обиди да се излечи, судбоносниот рецидив ја чинеше живот.

„Ејми беше девојка во своите дваесетти, која страдаше од зависност, и сите ние бевме дел од тоа. Сите гледавме,“ изјави нејзиниот најдобар пријател Тајлер Џејмс за „Тајмс“ во 2021 година.

Судскиот извештај потврди дека пејачката починала од „токсичност од алкохол“. Во моментот на смртта, нивото на алкохол во нејзиниот организам било повеќе од петпати над законски дозволената граница.

„Доживуваме некакво олеснување што конечно ја дознавме вистината,“ изјавија родителите на Вајнхаус по објавувањето на наодите.

Во месеците пред смртта, таа веќе не користела тешки дроги, а нејзиниот татко Мич изјави дека била „најсреќна по многу години“ и успеала да биде трезна три недели по ред. Тајлер Џејмс рече дека била многу блиску до тоа целосно да се откаже од алкохолот.

На денот на смртта, Вајнхаус последен пат разговарала со обезбедувањето околу 10 часот наутро, кажувајќи дека ќе оди да спие. Нејзиниот телохранител ја пронашол во кревет неколку часа подоцна. Брзата помош ја прогласила за почината во 15.54 часот. Докторката Кристина Ромете, која ја посетила претходната вечер, сведочеше дека била малку припивната, но свесна, присебна и способна за разговор.

„Не сакаше да умре. Се радуваше на иднината“, изјавила таа пред судот.

Последните зборови што ги кажала ги размениле со нејзината мајка Јанис.

„Му благодарам на Бог што тој ден ѝ реков: ‘Те сакам, Ејми’. Таа ми возврати: ‘И јас те сакам, мамо’“, изјави Јанис.

По објавувањето на трагичната вест, фановите се собираа пред нејзиниот дом во Кемден, оставаа цвеќиња, фотографии и пораки. Нејзиниот татко им се заблагодари лично: „Не можете да замислите колку ни значи ова. Ејми цел живот беше посветена на семејството, пријателите и на вас – нејзините обожаватели“.

Комеморацијата се одржа на 26 јули во синагога во северен Лондон, а присуствуваа околу 150 блиски личности, вклучувајќи го продуцентот Марк Ронсон и Кели Озборн. Татко ѝ одржа емотивен, но и духовит говор, споделувајќи анегдоти од нејзиното детство.

По нејзината смрт, животот и музиката на Вајнхаус продолжија да живеат низ документарни филмови, биографии и мемоари. Во 2015 година беше премиерно прикажан документарецот „Ејми“ („Amy“), кој освои и Оскар. Во 2024 година на големото платно пристигна биографскиот филм „Назад во црно“ („Back to Black“), со Мариса Абела во улогата на Вајнхаус, во режија на Сем Тејлор-Џонсон. Филмот дава искрен поглед кон жената зад славата и љубовната врска што го инспирирала истоимениот албум.

Абела изјави дека не пеела плејбек, туку сама ги изведувала песните.

„Кога влегуваш во нечиј лик, треба целосно да го оживееш. Тоа е мојата работа – да ја претставам Ејми во секој момент од нејзиниот живот“, изјави актерката.

Со повеќе од 16 милиони продадени копии од албумот „Back to Black“, Вајнхаус остана музичка икона. Адел во 2016 година изјави дека ѝ должи 90 отсто од својата кариера токму на неа.

„Ако не беше таа, немаше да напишам ниту една песна сама. Нејзиниот прв албум, ‘Frank’, ми го промени животот,“ рече Адел.

Во чест на нејзината борба и живот, семејството ја основа Фондацијата „Ејми Вајнхаус“, која помага на млади луѓе со проблеми со зависност. Во 2016 година беше отворен и рехабилитациски центар во источен Лондон, кој им помага на жени да се адаптираат по третман, нудејќи психолошка поддршка и физички активности.

Поранешниот сопруг на Ејми Вајнхаус во емотивно интервју: Ме обвинуваат за нејзината смрт, товарот го носам 10 години