Под доста профитабилни услови, една фирма чие име засега од Министерството за здравство го кријат под оправдание дека „уште трае постапката“, се пријавила на повикот за концесија за да изгради две катни гаражи во Клинички центар „Мајка Тереза“. Фирмата ќе треба годишно да исплаќа само 1 процент од приходот што го остварила кон Министерството за здравство, а останатите 99 проценти ќе бидат нејзини. Концесионерот ќе изгради две катни гаражи со приземје и два ката, едната кај Клиниката за гинекологија, а другата кај хелиодромот во Клинички центар и така ќе се оствари децениската декларативна заложба на повеќе влади за решавање на горливиот проблем со паркингот во најголемиот центар за терциерна здравствена заштита во државата.

Од проектната единица во Министерството за здравство побаравме одговори која е фирмата што се пријавила и дали ги исполнува условите.

Во постапката е примена една понуда, која е евалуирана и потребно е да се закаже е-аукција за поднесување конечна понуда, по што ќе следи потпишување договор. Согласно тендерската документација приватниот партнер треба да испроектира изведе и менаџира две катни гаражи во комплексот. До завршување на постапката не може да се открие името на понудувачот, велат од Министерството за здравство за „Слободен печат“.

Паркинг-просторот во Клинички центар „Мајка Тереза“ не е доволен да ги задоволи потребите на пациентите. Тие со часови се вртат во круг и бараат слободно паркинг-место, термините им пропаѓаат, а проблемот е и за возилата за итен медицински превоз што исто така се заробени во овој сообраќаен метеж.

Идејата со катни гаражи да се среди сообраќајниот хаос во Клинички центар датира повеќе од 12 години, уште од периодот кога министер за здравство беше Никола Тодоров. Според неговите тогашни проценки, дневно во просек влегувале 2040 возила, а паркингот тогаш имал само 1.000 места за автомобили. Предлогот на Тодоров беше изградба на две катни гаражи со по 1.250 паркинг-места по гаража. Но ова не се оствари иако беа одредени локациите за градба – во близина на Фармацевтскиот факултет и на местото на Институтот за туберкулоза.

Владата минатото лето донесе одлука со јавно-приватно партнерство да се изградат монтажните катни гаражи. Изработена беше и поправка на физибилити студијата во која беа наведени условите за изградба на двете монтажни катни гаражи за да се надмине проблемот со паркирањето со ветување дека тројно ќе се зголеми бројот на места за паркирање.

Приватниот партнер чие име уште не се открива, бидејќи договорот уште не е склучен ќе ги наплаќаат билетите пресметано на час како и досега. Физибилити студијата предвидува дека ако концесионерот изгради 2 катни гаражи, тогаш ќе ја има концесијата на 15 години со што би заработил 19 милиони евра кои би ги повратил за 4 години. Изградбата на двете катни гаражи би чинела нешто над 10 милиони евра.

Министерот за здравство Арбен Таравари за медиумите изјави дека со изградбата на катната гаража кај Гинекологија, ќе се обезбедат нови 350 паркинг-места, а со изградбата на гаражата кај хелиодромот се планирани 500 паркинг-места.

-Планирано е да се изградат два објекти со вкупно 850 нови паркинг- места. Конкурирала само една фирма и процесот е во фаза на евалуација за да се види дали ги исполнува условите. Се работи според физибилити студијата од пред две години, рече Таравари.

Се поставува прашањето зошто овој милионски профит не го презеде самото Министерство и зошто самото не ги изгради катните гаражи наместо да добива само еден процент од годишните приходи од паркирање, но Таравари вели дека Министерството за таа намена нема добиено пари од буџетот. Таравари смета дека договорот ќе биде фер, затоа што инвеститорот нема гаранција дека ќе остане на локацијата каде што е Клинички центар бидејќи ако се изгради нов, ќе мора да си замине од локацијата. Но, нов клинички центар исто така е децениско неостварено ветување на бројни влади.

Пред две години тогашниот директор на Градски паркинг, Бојан Христовски, рече дека на јавното паркиралиште „Клинички центар“ има 832  паркинг-места, пет за лица со попреченост и четири резервирани за мајки со дете. Дел од овие паркинг-места секој ден се „резервирани“ и за вработените во Клинички центар. Иако Градски паркинг се обиде да воведе ред во безредието, капацитетот е нешто на коешто не можат да влијаат. Медицинскиот центар секој ден е место на нервозни сцени поради немањето паркинг, а не се имуни ни луѓето од персоналот.