Во медицинските центри надвор од државава во моментов се лекуваат 68 лица кои беа повредени во пожарот во дискотеката „Пулс“ во Кочани. Како што соопштија од Министерството за здравство, испишан е еден пациент од медицинскиот центар во Љубљана, а медицинскиот третман ќе го продолжи во друга држава, каде има здравствено осигурување.

– Најавени се неколку исписи за пациенти за наредниве денови, по финализирање на постапката со протоколите. Непроменета останува состојбата на пациентите кои се третираат во странство, вклучително и состојбата на критичните пациенти – се наведува во соопштението.

Во државава, шестмина пациенти се лекуваат во хируршката клиника „Свети Наум Охридски“, двајца на Клиниката за токсикологија, еден пациент на Клиниката за пластична хирургија. Двајца пациенти се лекуваат во „Систина“, според податоците на Министерството.

– Секојдневно ја следиме состојбата со повредените пациенти и продолжуваме со информирање на јавноста на дневна основа, обезбедувајќи најдобра здравствена нега и грижа за сите пациенти – велат од Министерството.

Пожарот во дискотеката „Пулс“ во Кочани избувна рано наутро на 16 март. Шеесет лица го изгубија животот во трагедијата.