Еден од отуѓените синови на тајландскиот крал се врати во земјата по 27 години
Вториот најстар син на тајландскиот крал Маха Ваџиралонгкорн вчера го посетил центарот за згрижување деца за непривилегирани семејства за време на ненадејната посета на кралството, што е негово прво враќање во земјата по 27 години, пренесува „Ројтерс“.
Препорачано
Посетата на Вачараесорн Вивачаравонгсе (42) доаѓа во тежок момент за тајландското кралско семејство, откако во декември беше објавено дека најстарата ќерка на монархот е во кома.
Вачараесорн, кој работи во адвокатска канцеларија во Њујорк, ја посетил Фондацијата за грижа за децата од сиромашните, која е поддржана од кралското семејство и ги поздравил добронамерниците.
Облечен во фармерки и лежерна црна кошула, тој позирал за медиумите пред портретите на неговиот татко и неговиот дедо, кралот Бумибол Адуљадеј, кој починал во 2016 година по 70-годишно владеење.
„Воодушевен сум што се враќам. Бев отсутен долго време, 27 години. Враќањето ми е како остварен сон“, изјави Вачараесорн за новинарите во фондацијата во Бангкок.
Кралската палата не ја коментираше посетата.
Многу Тајланѓани беа изненадени од враќањето на Вачараесорн. Сликата од него во Бангкок, што ја објавил во понеделникот на неговата Фејсбук страница, која има повеќе од 80.000 следбеници, добила десетици илјади лајкови.
Вачараесорн е вториот од четирите синови на втората сопруга на кралот Ваџиралонгкорн, Сујарине Вивачаравонгсе, поранешна актерка од која тогашниот престолонаследник се развел во 1996 година.
Тој немал формална кралска титула иако технички го задржал статусот доделен кога бил дете како внук на монарх. Тој, неговата мајка, тројцата браќа и едната сестра биле отуѓени по разводот во 1996 година, во кој неговата мајка била јавно обвинета за прељуба, и тие се преселиле во странство.
Помладата сестра на Вачараесорн подоцна била повторно прифатена од кралското семејство и ја добила кралската титула принцеза Сириваннавари Нариратана. Таа е моден дизајнер и коњаник кој се натпреварувала на Азиските игри во 2014 година за Тајланд.
Трипати разведениот крал Ваџиралонгкорн има седум деца. Тој во моментов е оженет со кралицата Сутида, негова поранешна главна телохранителка со која се оженил неколку дена пред неговото крунисување во 2019 година. 71-годишниот монарх не именувал официјален наследник.
Кон крајот на декември, најстарото дете на кралот, принцезата Бајракитијабха Нарендира Дебјавати (44) колабирала поради тешка срцева болест. Таа сѐ уште е во кома.
