Британската нискобуџетна авио – компанија „EasyJet“ објави план според кој се укинуваат 4.500 работни позиции и се намалува флотата на летала со цел да се прилагоди на малата побарувачка на „уништениот“ пазар на патување поради Ковид – 19.

„EasyJet“ во моментов има 15 илјади вработени лица во осум европски земји, а следните денови планира да отпочне со процесот на советување за најавените откази.

Од компанијата најавуваат и дека во наредната половина од годината во функција ќе биде 30 проценти од вкупниот капацитет, што одговара на 302 летала, 51 помалку во споредба со првичните планови пред почетокот на пандемијата од корона вирусот.

Од „EasyJet“ истакнуваат дека се насочени кон намалување на трошоците и дека продолжуваат со разговорите со компаниите за лизинг и проджба на авиони со цел да обезбедат дополнителни средства.

Проценуваат дека со евентуална продажба би можеле да обезбедат меѓу 500 и 650 милиони фунти.