Американската актерка Никол Егерт (52), ѕвезда на популарната телевизиска серија „Чувари на плажата“ („Baywatch“), неодамна објави дека боледува од рак на дојка, а сега призна дека жали што на 18-годишна возраст „отишла под нож“ и ги зголемила градите.

Егерт станала „свесна за себе“, односно за нејзиниот изглед, за време на снимањето на серијата и сакала да ги зголеми градите.

„Ги гледам сите овие млади девојки кои го прават тоа и се згрозувам. Мој совет е да ги оставите своите тела на мира“, изјавила актерката во интервју за магазинот „Пипл“.

„Но, кога треба да го облечете тој едноделен костим за капење и сте толку рамни, тогаш нема што да направите. Не можете да го наполните со нешто“, се присетила Егерт, која истакнала дека не била „физички, ниту психички“ подготвена за секојдневно снимање во костим за капење.

Понатаму, таа рече дека не била свесна дека добила улога во култната „Чувари на плажата“ и дека во тоа време мислела дека ќе глуми во „спин-оф серија за средношколците во Малибу“. Својата одлука да глуми во серијата ја нарече „глупава“.

Оттогаш, актерката била подложена на низа операции на градите, вклучително и намалување на градите.

Да потсетиме, Егерт откри дека боледува од рак во втор стадиум на почетокот од месецов. Тогаш актерката сподели дека чека да оди во операционата сала за да „ѝ се отстрани болната грутка“ од левата дојка и да дознае кога би можела да започне со хемотерапија.

Актерката признала дека често „ја фаќа паника бидејќи знае дека ракот во неа расте со секоја секунда“, а најтешка ѝ е помислата да ги остави ќерките Дилин (25) и Киган (12).

„Дилин е возрасна, но дома имам и 12-годишна ќерка. Јас сум нејзин единствен старател, немам семејство, немам ништо“, објаснила таа.