Германскиот репрезентативец Џошуа Кимих ќе потпише нов договор со Баерн Минхен, пренесува Билд.

Односот Кимих-Баерн е многу турбулентен во последните денови, бидејќи првично пристигна информација дека двете страни не се договориле за нова соработка, а фудбалерот ќе го напушти баварскиот гигант на лето.

Сепак, вчерашните извештаи говореа дека Кимих е блиску до наоѓање заеднички јазик со својот сакан клуб и денеска од Билд добиваме потврда дека наскоро ќе парафира соработка до 2029 година.

Се зборуваше за негово евентуално заминување во Премиер лигата, каде во првите редови на колумните во весниците беа имињата на Ливерпул и Арсенал, но германскиот весник наведува дека тој не бил во преговори со ниту еден друг клуб, туку само сакал да остане во Баерн, а тој и неговите претставници работеле на тој случај.

Баварците исто така сакаа тој да остане еден од нивните најдобри и најсигурни играчи, без разлика дали станува збор за десен бек или во дефанзивниот среден ред. Кимих во Минхен пристигна во 2015 година од Штутгарт.