Познатиот борач и актер Џон Сина (47) сподели дека двапати му бил дијагностициран и лекуван рак на кожа. Во рамките на нова кампања што ја нагласува важноста на заштитата од сонце, тој отворено зборуваше за своето искуство со болеста.

Во интервју за „Пипл“, призна дека како дете никогаш не користел заштитни креми за сонце.

„Роден сум во 1977 година, во тоа време не знаевме многу за важноста на заштитата на кожата. Подоцна, кога се преселив на Флорида, не обрнував доволно внимание на тоа“, рече Сина.

Тој додаде дека не сакал да следи рутина и бил уверен дека рак на кожа не може да му се случи нему. Сепак, долгогодишното изложување на сонце без заштита си го направило своето. За време на редовен преглед, дерматологот забележал сомнителна промена на неговата кожа, која била успешно отстранета навреме.

„Кога ќе ви соопштат ваква вест, веднаш мислите на најлошото“, признава Сина. Сепак, вели дека поддршката од лекарите му помогнала полесно да се справи со ситуацијата.

Година дена подоцна, му била отстранета уште една сомнителна промена на кожата. Иако понекогаш размислува за можните негативни исходи, вели дека е благодарен што навреме биле откриени двете опасности.

„Тоа ме потсети колку е важно да одвојам неколку секунди секој ден за да се заштитам од сонцето“, истакна тој.

Минатата година Сина предизвика големо внимание во јавноста кога зборуваше за родителството и објасни зошто не сака да има деца.

„Свесен сум дека да се биде добар родител бара многу вложување и жртва. Знам дека сум тврдоглав и често размислувам себично, а бидејќи сум љубопитен и сакам да истражувам, не мислам дека некогаш ќе бидам подготвен да посветам толку време за да одгледувам дете. Сакам да го живеам животот на свој начин“, рече актерот.

Тој додаде дека неговата сопруга, Шеј Шариацаде, со која е во брак од 2020 година, целосно ја поддржува неговата одлука. Истакна дека тие многупати разговарале за оваа тема и дека уште од почетокот на нивната врска биле на иста бранова должина.

„Оваа одлука не ја донесов лесно. Размислувам за тоа уште од тинејџерските години и сфатив дека тоа е најдобриот избор за мене“, заклучи Сина.