Поранешниот американски тенисер Џон Мекинро ги критикуваше организаторите на „Ролан Гарос“ бидејќи го натераа Новак Ѓоковиќ да го игра мечот со Лоренцо Музети во 22.30 часот.

Српскиот тенисер Ѓоковиќ поради повреда на коленото мораше да се повлече од „Ролан Гарос“, а во средата беше опериран на менискусот за да биде подготвен за Олимписките игри во Париз. Ѓоковиќ се повреди во вториот сет од осминафиналето, но сепак го доби тој меч против Франсиско Серундоло, но не можеше да го продолжи натпреварувањето.

„Ролан Гарос“: Алкараз го совлада Циципас и закажа полуфинале против Синер

Ноле на мечот со Аргентинецот во неколку наврати му објаснуваше на супервизорот дека теренот не е во ред, да направат нешто за да не се повреди, но супервизорот и судијата го игнорираа. Ѓоковиќ одигра два меча за неполни 48 часа, од кои едниот заврши во три по полноќ, на теренот мина девет часа, а сето тоа придонесе за повредата.

Мекинро ги критикуваше Французите и ги обвини дека се виновни што Ѓоковиќ го повредил коленото. Мекинро е еден од ретките кои се огласија по скандалот и без двоумење застанаа во одбрана на Новак.

– Големата грешка на организаторите е што го ставија 37-годишниот Новак Ѓоковиќ на теренот во 22 часот и 30 минути без да помислат колку би можел да трае неговиот меч со Музети – изјави Мекинро за француски „Фигаро“.

На Новак и претходно го мачеше коленото, а ситуацијата се влоши на последните два меча.

– Временските услови беа многу лоши, беа во комплицирана ситуација. Разбирам дека сакаа да постигнат сè, но имаше и други решенија за да не биде на програмата мечот меѓу Бергс и Димитров. Коленото на Новак го мачеше со недели, а по мечот легна да спие во седум часот наутро, а потоа се врати да игра ден и пол подоцна. Тоа е предизвик за сите. Повторно се избори за пет сета, тоа е премногу, дури и за Новак. Иако не сме 100% сигурни, тоа е една од причините поради која го повреди коленото. Во секој случај, вака не се третира ниту еден играч, а камоли најдобриот во светот – вели Мекинро.