Групата „Некст ту сајленс“ (Next to Silence) неодамна го промовираше видеоспотот за композицијата „Цунами“ (Tsunami). Спотот е снимен на археолошкиот локалитет „Плоча – Миќов Град“ на Охридското Езеро.

Реализацијата на спотот е остварена во соработка меѓу музичката група, Завод и музеј – Охрид и Центарот за истражување на предисторијата. Автор на видеото е Христијан Талевски, додека звукот е снимен од Ивица Јанкуловски.

Музичкото видео воедно е и најава за концертот на „Некст ту сајленс“ во охридскиот клуб „Џез-ин“ (Jazz Inn), што ќе се одржи на 11 јули (четврток), со почеток во 22 часот. Концертот е дел од настаните со кои ова легендарно џез-кафуле го одбележува јубилејот 35 години од своето постоење.

На својот настап „Некст ту сајленс“ ќе свират авторска музика од нивниот прв албум издаден за Скопскиот џез фестивал во 2020 година, но и дел од новите композиции кои составот ги создаде во меѓувреме.