Новоформираната Национална установа Џез оркестар добива нова, трајна адреса, во зграда бр.1, влез 1, на бул. „Гоце Делчев“ бр.4, на Катастарска парцела бр. 9505/1, Катастарска општина Центар 1, со Имотен лист бр. 40986, под Националната опера и балет.

Оваа одлука беше изгласана на владина седница. Министерката за култура Бисера Костадиновска-Стојчевска на прес-конференција одржана на 20 јуни појасни дека станува збор за дел од вкупниот простор од 1.448 м2 под Националната опера и балет, простор од 475 м2.

– Овој простор од 475 м2 е со трајно користење на Министерството за култура. Откако беше заокружен целиот процес, кој заради почитување на законските процедури и рокови неминовно траеше неколку недели, Владата на денешната седница донесе одлука овој простор да ѝ припадне на Националната установа Џез-оркестар и на тој начин најдобро да го искористи и да го сочува државниот имот. Ќе нагласам – иако станува збор за државен имот, беше потребно време за комплетирање на документацијата, запазување на сите законски постапки и изготвување проект за реконструкција и адаптација на просторот, а сето тоа одеше етапно и се разгледуваше на неколку владини седници – појасни министерката за култура.

Таа посочи дека чесен епилог на сето ова е извинувања кон јавноста и публиката од директорката и од Управниот одбор на НУ Филхармонија. Филхармоничарите организираа низа протести, искажувајќи незадоволство што Џез оркестарот беше планирано да биде сместен во нивните простории.

– Свесно манипулираа со врвни музичари, но и со авторитети од светот на културата, убедувајќи ги дека јас и оваа влада сакаме да ја земеме зградата на Филхармонија и воедно свесно ги изложија на критики од јавноста како нетрпеливи и безобѕирни домаќини – додаде министерката.

Изразувајќи уверување дека вработените во Филхармонија ќе си останат на зборот и дека нивните колеги од Џез-оркестарот ќе можат да ги одржат своите генерални проби и концерти во зградата на Филхармонија, Костадиновска-Стојчевска ги повика сите вработени во Филхармонија да ги запрат протестите и да се вратат во нормалниот ритам на работа, да се посветат на творештвото и да дадат придонес во нормализација на односите, затоа што, како што рече, „тоа сите ѝ го должиме на публиката“.

(Текстот е објавен во „Културен печат“ број 184, во печатеното издание на весникот „Слободен печат“ на 24-25.6.2023)