Актерката Џенифер Лоренс го доби своето второ дете, објави списанието „Пипл“. По породувањето, на 31 март, таа била забележана во прошетка со сопругот Кук Марони низ Њујорк. Двојката, која стапи во брак во октомври 2019 година, веќе има тригодишен син, Сај. Засега, тие не ја потврдиле официјално радосната вест.

Лоренс за првпат објави дека очекува бебе во октомври 2024 година, во интервју за „Вог“.

„Честитки за Џенифер Лоренс! Добитничката на Оскар го очекува своето второ дете со сопругот Кук Марони“, напиша магазинот, наведувајќи дека претставниците на актерката ја потврдиле убавата вест. Извор близок до семејството тогаш изјави за „Пипл“ дека Лоренс е пресреќна што повторно ќе стане мајка.

Од раѓањето на нејзиното прво дете, Лоренс значително го промени пристапот кон својата кариера, избирајќи внимателно на кои проекти ќе работи. Таа сè повеќе го става семејниот живот во прв план.

„Домот е мојот приоритет, и тоа е најубавото нешто. Сега секој проект го проценувам според тоа дали вреди да бидам оддалечена од моето дете“, изјави актерката во интервју за „Интервју“ во 2023 година.