Силното крило на македонската сениорска кошаркарска репрезентација Џејкоб Вајли потпиша договор на една година со литванскиот гигант Ритас.

Нашиот најдобар кошаркар на првиот меч од претквалификациите за Светскиот Куп против Романија во Куманово (28 поени) направи еден сериозен исчекор во кариерата.

– Морам да кажам дека имав и други понуди, пред се од екипи од Шпанија. Но, се одлучив на онаа која дојде од мојата менаџерска агенција која ме води во една нова кошаркарска авантура. Да играм во една од нај кошаркарските земји во Европа, а можеби и во светот, Литванија.

Слушнав многу добри работи за Ритас, погледнав во медиумите, мислам дека ќе имаме и добар играчки состав во следната сезона. Тоа, заедно со оние услови за живот, за мене и за моето семејство, беа причините поради кои се одлучив да ставам крај на оние летни „чекања“ кои се секогаш присутни кај професионалните спортисти, во овој случај кошаркари – рече Вајли.

Порачува дека би сакал задоволството да биде уште поголемо доколку Македонија оди понатаму во претквалификациите:

– Задоволен сум од понудените услови, а верувајте ми дека би бил уште позадоволен кога со нашата репрезентација би направиле успех и во овој ФИБА „прозорец“, односно да стигнеме до победи кои не водат во следниот круг од натпреварувањето – се зборовите на Вајли.

По стартниот пораз од Романија (80:72), вториот меч од мундијалските претквалификации избраниците на селекторот Марјан Илиевски ќе го има в сабота во Шолнок против Унгарија.