Албанската Национална агенција за вработување и вештини (АКПА) соопштува дека во 2024 година во Албанија со редовен договор за вработување биле вработени над 13 илјади странски државјани.

„Зголемувањето на бројот на странци се должи на економскиот раст што го доживеа земјата. Во 2024 година на нашиот платен список се запишани 700 илјади вработени, од кои околу 13 илјади се странци кои аплицирале да се вработат во Албанија“, вели директорката на Службата за пазар на труд, Гертиола Чепани во интервју за медиумите.

Меѓу странците на пазарот на труд во Албанија доминираат Италијанци, Турци и Индијци, но има присуство и од други земји. Главни сектори каде што се обезбедени договори за вработување се услугите, сместувањето, градежништвото, трговијата и производството.

Законот предвидува сите странски државјани да обезбедат договор за вработување, за потоа да поднесат барање за дозвола за престој во Албанија.