Две момчиња од Србија нападнале Кинез со шишиња и го удирале по телото и по главата, објави српски Курир.

Обвинителството во Белград одреди задржување за 20-годишните М. К. и В. С. поради нанесување тешки телесни повреди во соизвршителство.

„Постои сомневање дека М. К. и В. С. на 4 август во 20:20 часот, на територијата на општина Савски Венац, му пришле на оштетениот 32-годишен Л. Х., државјанин на Народна Република Кина, и по вербална расправија му нанеле удари со шишиња што ги држеле во рацете, удирајќи го по телото и по главата, по што го напуштиле местото на настанот“, соопшти Обвинителството.

Напаѓачите биле сослушани во просториите на обвинителството, но не ја изнеле својата одбрана, односно го искористиле законското право да не даваат изјава.

Првото основно јавно обвинителство во Белград предложи до Првиот основен суд во Белград да им се одреди притвор на М. К. и на В. С., поради можност да го попречат постапувањето со влијание врз сведоците, но и бидејќи начинот на извршување и тежината на последиците предизвикале вознемиреност во јавноста, што може да го загрози непреченото и правично водење на кривичната постапка.