Двајца борци кои го поддржуваа Хезболах беа убиени во израелските напади во Сирија

Хезболах
Знаме на Хезболах/ Фото Архива на Слободен печат

Во израелските напади врз позициите на Хезболах, либанското вооружено движење поврзано со палестинското движење Хамас, во близина на Дамаск во Сирија, денеска беа убиени двајца сириски борци кои го поддржуваа Хезболах, објави сириската невладина Опсерваторија за човекови права.

„Двајца кои се бореа за Хезболах беа убиени, а седуммина беа ранети во израелските воздушни напади врз позициите на организацијата во близина на Саид Зеинаб“, изјави директорот на Опсерваторијата Рами Абдел Рахман.

Израел изврши стотици воздушни напади во соседна Сирија од почетокот на граѓанската војна во земјата во 2011 година, насочени кон позиции на сириската армија и групи поврзани со Иран, како што е либанскиот Хезболах.

Тие напади се зголемија од 7 октомври и почетокот на војната меѓу Израел и палестинскиот Хамас во Појасот Газа, предизвикана од нападот на Хамас врз Израел.

Директорот на Опсерваторијата претходно за АФП изјави дека Израел ги погодил „метите на Хезболах“ во регионот Саида Зеинаб, јужно од Дамаск.

Израелските напади ги потврди и сириското Министерство за одбрана.

„Околу 1:30 часот, израелскиот непријател изврши воздушен напад од сирискиот окупиран Голан, гаѓајќи некои точки во близина на градот Дамаск“, се вели во соопштението на Министерството. Не е наведено дали има жртви.

Израелската армија се уште не ги коментираше извештаите. Израел ретко ги коментира своите операции во Сирија, но вели дека сака да го спречи Иран да се зацврсти во близина на Израел.

Тројца проирански борци беа убиени на 8 ноември во израелските напади врз позициите на либанскиот Хезболах.

Аеродромот во Дамаск повторно беше цел на израелски воздушни напади на 26 ноември, принудувајќи го да се затвори, само неколку часа по обновувањето на летовите прекинати од слични израелски напади во октомври.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот