Два месеци Обвинителството во Гевгелија води предистражна постапка по сторијата што ја објави „Слободен печат“ – Докторка од Гевгелија „доктор за фалсификати“. Станува збор за документирана сторија  која ни ја предочија свиркачи а потоа беше потврдена и од директорот на болницата во Гевгелија – дека таму имало докторка што специјализирала на државна сметка, само неколку месеци по завршувањето на Медицински факултет, а за сето време фигурирала како вработена во болницата во Гевгелија.

-Предистражните дејствија продолжуваат во насока на распит на сведоци – поранешен директор на болницата, членови на комисијата за прием и други кои имаат сознанија за конкретната постапка. По целосно испитување на настанот, ќе биде донесена јавнообвинителска одлука, велат од Обвинителството за „Слободен печат“.

Според она кое што пред  два месеци за „Слободен печат“ го изјави директорот на болницата во Гевгелија доктор Патрик Матх, специјализацијата на докторката ѝ била поништена откако ѝ била со години плаќана од буџетот на болницата, затоа што кога ја запишала специјализацијата – уште немала дипломирано.

Во меѓупериодот болницата ѝ исплаќала плата за општ лекар и надоместок за одвоен живот. Де факто докторката била вработена во гевгелиската болница од 2016 година на работното место доктор на медицина, без да има лиценца од Лекарската комора ниту пак завршен Медицински факултет во тоа време, што е незаконски.

Целиот сет лажни документи дека е наводен дипломиран доктор по медицина, во 2016 година на A.A. ѝ донел бројни „поволности“ – вработување во болницата во Гевгелија како лекар (иако во тоа време била само студент по медицина), докторска плата, а Управниот одбор дури и решил да ѝ ја даде можноста за која многу вистински дипломирани лекари може само да сонуваат – државна специјализација по анестезиологија и интензивно лекување. Една од најодговорните, најризичните, најтешките и најдефицитарните гранки во државното здравство, со која се успиваат пациентите пред операција или „ѝ се помага на судбината“ за тие да се разбудат од неа.

А.A. специјализацијата ја запишала на Универзитетот „Гоце Делчев“ во Штип, далеку од Медицинскиот факултет во Скопје, каде истовремено била студентка на општа медицина запишана во 2007 година.

Имено, на 18 април 2024 година, А.А. ја добива својата прва и единствена валидна лиценца од Лекарската комора, откако после 16 години студирање, положила стручен испит на Медицинскиот факултет во Скопје. До тој датум, таа долги години веќе работи во болницата во Гевгелија и истовремено специјализира на трошок на болницата иако уште не била ни дипломирана!

Но, со оглед на тоа што пред да дипломира, таа всушност со години веќе специјализирала во Штип, дошол моментот да го добие и уверението за специјализацијата и само три месеци подоцна станува специјалист по анестезија на 4 јули 2024 година. Сите што ги виделе овие два датуми, односно добивањето на лиценцата од комората за доктор по медицина на 18 април и добивањето на уверението за завршена специјализација само три месеци подоцна на 4 јули, се фатиле за глава. Сфатиле дека тоа е неможно. Освен во случај на изигрување на системот на грбот на парите и здравјето на пациентите.

Директорот на болницата доктор Матх за „Слободен печат“ изјави дека болницата освен што ѝ дала отказ на А.А, исто така потпишала договор со неа, во кој таа се согласува да врати 120 илјади евра во рок од 6 месеци по основ на плати и надоместок за одвоен живот, како и за бадијала платената специјализација.

Од Универзитетот „Гоце Делчев“ Штип ни потврдија дека кога Лекарската комора ги известила оти уверението за положен стручен испит, со кое А.А. се пријавила за специјализација, всушност не постои, донесена е одлука за поништување на издаденото уверение за специјалист и комплетно на специјалистичкиот стаж. Специјализацијата ѝ е поништена на 19 август годинава.

– Одлуката за поништување од наша страна е доставена до Лекарска комора на РСМ, ЈЗУ Општа болница Гевгелија и до А.А. – велат од УГД Штип.