За организирање на најголемиот комеморативен собир на 1 ноември, на годишнината од падот на настрешницата во Нови Сад која усмрти 16 луѓе, на студентите во блокадата на универзитетот во Нови Сад им треба помош. Тие упатија апел до сите граѓани кои можат и кои сакаат да им помогнат да ги угостат колегите од цела Србија, објави Нова.рс.

Студентите велат дека денеска и утре ќе биде организирана акција за донации и ги замолуваат сите кои се во можност да донесат душеци и постелнина пред Ректоратот, бидејќи, како што наведуваат, администрацијата на универзитетот им наложила да ги извадат сите работи што ги имаат, а се наоѓаат во оваа зграда, во спротивно ќе ги фрлат на улица.

Студентите во блокадата, исто така, апелираат до сите што имаат возила да им помогнат со префрлувањето на потребните работи во истиот овој временски период за да ги угостат своите колеги.

„На неколку факултети во Нови Сад ни требаат душеци, постелнина, вреќи за спиење бидејќи таму ќе спијат нашите колеги од цела Србија. Колегите од Белград објавија дека заминуваат еден ден претходно, на 31 октомври, па затоа ни е потребно сето ова итно, за да се подготвиме на време. Очекуваме голем број пешаци, многу повеќе отколку на кој било претходен протест, и сите тие ќе спијат на факултетите.“, изјави студент од еден од факултетите од Нови Сад.

Студентите на Универзитетот во Белград, кои веќе 10 месеци го блокираат факултетот барајќи одговорност за смртта на 16 жртви, почнаа подготовки за учество на протестот на 1 ноември, на кој беа поканети од нивните колеги од Нови Сад. Околу 4.000 студенти ќе тргнат пеш на пат кон Нови Сад на 31 октомври, денот пред годишнината од трагедијата.

„Единствената официјална информација што ја имаме, барем ние од универзитетот во Белград, е дека дефинитивно ќе пешачиме до Нови Сад. Планот е да патуваме два дена, како што веќе направивме кога блокиравме три моста со жителите на Нови Сад. А сега, има голем интерес. Имаме голема поддршка од граѓанските собранија, многу поголема отколку што имавме претходно, па верувам дека групата пешаци ќе биде многу, многу поголема отколку во февруари.“, изјави студент што ќе учествува на протестот на 1 ноември.