„Дрзок грабеж од шокантни размери“: Џејми Оливер апелираше за кражба на сирење со вредност од 300.000 фунти
Познатиот готвач Џејми Оливер апелираше до љубителите на сирење да ѝ помогнат на полицијата да ги фати луѓето кои измамиле лондонска млекарница за познат англиски и велшки чедар во вредност од повеќе од 300.000 фунти.
Препорачано
„Niles Yard Dairy“, дистрибутер и трговец на мало на британско занаетчиско сирење, испорачал 22 тони наградуван чедар на наводен измамник кој се претставил како дистрибутер за голем француски трговец на мало.
Лондонската компанија набрзо сфатила дека се работи за измама, пишува „Гардијан“.
Оливер ја опиша кражбата на чедарот како „дрзок грабеж од шокантни размери“ и им порача на следбениците на Инстаграм да внимаваат на секој што продава ваков вид сирење по ниска цена.
Меѓу украдените производи се органскиот чедар Хафод Велш, чедарот Весткомб и чедарот Пичфорк, кои имаат освоено бројни награди и се меѓу „најбараните занаетчиски сирења во Велика Британија“, соопшти лондонската млекарница.
Цената на овие сирења за парче со тежина помеѓу 250 и 300 грама се движи помеѓу 7,15 и 12,90 фунти.
Млекарницата додаде дека соработува со полицијата и ги повика трговците да контактираат со нив доколку се сомневаат дека им е продадено украдено сирење.
