Владата со грантови од седум и десет илјади евра ќе ги потикнува младите да отворат сопствен бизнис. Како што најави министерот за економија, Бесар Дурмиши на прес-конференција за граѓаните над 29 години се доделува грант од 430.500 денари (околу 7.000 евра), додека за лицата до 29 години поддршката е до 615.000 денари (10.000 евра) за започнување сопствена дејност.

Државна помош ќе има и за лицата со попреченост за кои се предвидени средства до 250.000 денари над основниот грант, со цел да се создадат еднакви услови за сите заинтересирани.

Рокот за аплицирање е до 20 јуни, а право на учество имаат невработени лица евидентирани во Агенцијата за вработување, рурални жени, корисници на гарантирана минимална помош, лица со попреченост, жени жртви на семејно насилство, повратници од странство и граѓани кои сакаат да ја формализираат својата дејност.

Двете мерки вклучуваат и целосна поддршка преку обука за претприемништво, изработка на бизнис план и шестмесечно менторство, со цел граѓаните не само да добијат финансиска поддршка, туку и знаење и насоки за успешно водење на сопствен бизнис.

– Нашата цел е јасна – да поддржиме што повеќе граѓани кои сакаат да градат нешто свое на одржлив и легален начин. Ова не е само финансиска помош, туку и директна инвестиција во потенцијалот на граѓаните и развојот на економијата. Ова не е само ветување, туку создавање реални можности за вработување и развој – изјави министерот Дурмиши.

Како што објасни Дурмиши, од јавниот повик се исклучени одредени дејности – дел од земјоделските активности, такси превоз, игри на среќа, осигурување и посредување при вработување. Сепак, за рурални жени и лица со попреченост важат одредени исклучоци, согласно со постојната регулатива.