Американската актерка Дру Баримор откри дека не била во емотивна врска по разводот со актерот Вил Копелман во 2016 година, но и дека денес нејзиниот став за сексуалните односи е сосема поинаков.

Неодамна, актерката сподели фотографија на социјалните мрежи на која држи лаптоп , а во описот на објавата ги повика нејзините следбеници да ја прочитаат нејзината „многу лична приказна“.

„На речиси 48 години се чувствувам сосема поинаку за интимноста отколку кога растев. Немав родители кои ми беа примери и од мала се дружев со луѓе на ‘возрасен’ начин“, откри актерката.

 

View this post on Instagram

 

A post shared by Drew Barrymore (@drewbarrymore)

Во минатото, таа барала „возбуда, потврда и авантура“ преку сексот, но со оглед на тоа дека не постои начин да го промени своето минато, Беримор вели дека денес избира да гледа на ситуацијата на позитивен начин.

„По раѓањето на двете деца и разделбата од нивниот татко, го сменив фокусот кога е во прашање љубовта кон себе и двете ќерки“, вели таа, додавајќи дека тоа не ги вклучува мажите, ниту ги вклучувало некогаш.

Баримор сподели и дека, во една прилика, терапевт ѝ рекол дека сексот не е љубов, туку само израз на љубов.

„Цел живот барав такви зборови кои ќе ми помогнат да ја разберам разликата и сега, благодарение на него, разбирам“, истакна филмската ѕвезда.

Актерката признава дека откако станала самохрана мајка, не можела да влезе во нова интимна врска.

„Во моментов сум во целосно поинакво место во животот и можеби во блиска иднина би влегла во врска… Но, тоа не ми е приоритет. Немам потреба од секс и немам потреба за такви односи со луѓето. Целосно сум посветена на тоа да покажам како младите девојки, моите ќерки и јас како жена треба да функционираат во овој свет“, вели таа.

Исто така, таа потенцира дека не го мрази сексот, но дека сфатила дека љубовта и сексот не се иста работа.