Денеска во реванш натпреварот од второто квалификациско коло во Лигата на шампионите ФК Копенхаген по вторпат ја совлада Дрита од Косово овој пат на гости со 1:0 и со вкупни 3:0 данскиот претставник оди во следната фаза.

Така, сега е познато дека Дрита на нашите интернационалци Егзон Бејтулаи и Блертон Шеји ќе биде противникот на Шкендија во третото квалификациско коло на Лига Европа, доколку тетовските „црвено-црни“ бидат елиминирани од романскиот ФЦСБ во второто квалификациско коло на ЛШ. Играчите на Јетон Беќири в среда бранат позитива од 1:0 од првиот меч во Скопје.

Доколку македонскиот првак успее да излезе како победник во двомечот против ФЦСБ, во третото квалификациско коло на ЛШ ќе игра против Шелбурн (Ирска) или Карабах (Азербејџан). Претставникот од Азербејџан по првиот меч има предност од 3:0 остварена на гостински терен.

Во третото квалификациско коло на Лигата на шампионите вечерва се пласираа и екипите на Каират Алмати (Казахстан), Динамо Киев (Украина), Црвена звезда (Србија) и Слован Братислава (Словачка).

Во третото квалификациско коло на Лига Европа ќе продолжат КуПС (Финска), Хамрум (Малта), Линколн Ред Импс (Гибралтар) и Зрињски (Босна и Херцеговина).