„Нестле“ објави дека цените на неговите производи, вклучувајќи ги и плочките „кит кет“ и капсулите „неспресо“, би можеле повторно да пораснат. Зголемувањето на цената на овие производи е оправдано со новите американски царини, кои го зголемуваат притисокот врз веќе рекордните цени на суровините. Во првата половина од 2025 година, „Нестле“ забележа раст на продажбата од 2,9 проценти на годишно ниво, над очекувањата на аналитичарите, првенствено благодарение на зголемувањето од 2,7 проценти на цените на производите и фокусот на премиум брендовите, објавува Ројтерс.

Сепак, вкупните приходи на компанијата се намалија за 1,8 проценти на годишно ниво на 44,2 милијарди швајцарски франци, што е последица на негативниот валутен ефект од 4,7 проценти, односно високата јачина на франкот во споредба со другите валути. Извршниот директор на „Нестле“, Лоран Фриз, кој ја презеде функцијата точно пред една година, нагласи дека компанијата сега се фокусира на раст преку брендови со поголема вредност, а во исто време решава проблеми со непрофитабилните делови од бизнисот.

„Нестле“ потврди дека се држи до своите проекции за 2025 година – вклучувајќи го очекуваниот раст и маржата на оперативен профит од најмалку 16 проценти. Акциите на компанијата се зголемија за околу четири проценти од почетокот на годината, но сè уште заостануваат зад конкурентите како што се „Унилевер“ и „Данон“.

Фриз на конференцијата за инвеститорите изјави дека цената на кафето и какаото пораснала до нивните историски максимуми, што дополнително ќе влијае на растот на цените на производите на „Нестле“. Цените на кафето арабика се зголемија повеќе од двојно од почетокот на 2023 година, а цените на какаото се зголемија повеќе од трипати, објави CNN.