На Клиниката за детски болести во Скопје, од вкупно вработени 45 доктори специјалисти, дежураат само по тројца доктори, а притоа ниту еден од нив не дежура во амбулантата на Клиниката. Прегледите во дежурната амбуланта се вршат од страна на специјализанти, кои издаваат медицинска документација во име на дежурните доктори специјалисти, а некогаш и документација и без потпис и печат. Ова е една од причините поради кои Државниот здравствен и санитарен инспекторат денеска парично ја казни Клиниката. Прекршочниот платен налог за клиниката е 4.000 евра, а за директорот Реџеп Мемеди 1.200 евра. Ако парите се платат за 8 дена тогаш сумата се преполовува. Во спротивно сметките ќе се расчистуваат на суд.

Минатата недела директорот на Детската клиника се жалеше дека „му се правела хајка од луѓе што сакале да го заменат“, но со денешната контрола на ДСЗИ е евидентно дека на Клиниката врие од суштински проблеми.

ДСЗИ освен ова, констатирал и дека од вкупно 14 доктори специјализанти кои исполнуваат услов за добивање на времена лиценца од Лекарска комора на Македонија и времени факсимили за работа, само за двајца имало обезбедени времени лиценци за работа и не било поднесено барање до министерот за здравство за обезбедување времени факсимили за работа на Клиниката. Во ноќна смена во дежурна амбуланта, на Клиниката работат доктори специјализанти без времени факсимили за работа и доктори кои не исполнуваат услов постар специјализант.

Државниот санитарен и здравствен инспекторат денеска извршил инспекциски надзор на Детската клиника во Скопје, а откако биле откриени недостатоци, најавен е прекршочен платен налог. Исто така, инспекторите утврдиле дека Клиниката не постапила целосно по претходно издадено решение што им било издадено од ДСЗИ.

Од страна на установата, а во однос на издаденото решение, постапено било само во делот на внесување на личните податоци и медицинските податоци на пациентите – за извршените здравствени услуги, во интегрираниот здравствен информатички систем „Мој термин“.

Директорот на Детската Клиника Мемеди ги обвини „злонамерните поединци“ и „лажните Фејсбук профили” за хајка